Bandiera ladina, chi este pa per l ordenament giuridich talian?

Fosc zachei se à fat la domana, ma coche mai n avocat cogn se cruziar de la bandiera ladina?

Acà valch meis vin Gardena i me à fat na domana piutost scempia. I volea saer se fossa possibol sot l profil legal meter fora la bandiera sun ciasa de comun, apede chela taliana, chela europeana e chela de la Provinzia de Busan. Enben, canche é tacà a jir a fon te la costion, me n é ascort che la responeta no la é dalbon scontada.

Pruma de dut jon jit a veder se l era caji jà sozedui con autre bandiere, ajache volee saer coche i aea fat fora la costion. L prum che é troà l é chel de la bandiera de la pasc.

L cajo de la bandiera de la pasc

Tel otober 2004 n Consei de Comun del Molise aea deliberà de meter fora, apede a la bandiera taliana e europeana, chela de la pasc. No i l aesse mai fat! L Prefet à sobito ordenà de la tor de mez e mingol do l cajo l é stat portà ence a la Cambra di deputac con tant de interogazion parlamentara. Descheche sozet semper tel ciamp del derit, doi l era le tesi su la costion. Na pruma dijea che la bandiera de la pasc l é esprescion del art. 11 de la Costituzion, ajache la Talia refuda la vera. Apede chest se dijea che la raprejenta n messaje universal e che no l era negun diviet de tacar fora chesta bandiera. Per la seconda tesi enveze, l art. 11 de la Costituzion no à nia a che far con chesta bandiera, e aboncont se trata de n simbol privat. La Presidenza del Consei di Ministres é jita do chesta seconda tesi e tel dar responeta a la costion l’à dit che no l é possibol, ajache ti frabicac publics pel esser metù fora demò le bandiere istituzionale, e chest per via del carater neutral de le istituzions, carater che l é n prinzip fondamental de la democrazia.

Dit chest, zachei podessa dir che la bandiera ladina no à nia a che far con la bandiera de la pasc. Chest l é ben vera, ma se trata de n cajo che ne dasc l met de entener cala che l é la protezion arsegurada al tricolor talian.

La degnità de la bandiera taliana

La Costituzion, do la lege nr 22/1998 e l regolament de atuazion d.P.R. nr 121/2000 ge garantesc al tricolor talian sia degnità. En particolar la normativa disc co e can che se pel meter fora la bandiera taliana sui frabicac publics, e soraldut la disc cale bandiere pel star apede a chela taliana, e ence l relatif orden de esposizion.

Anter duta chesta regolamentazion, nia vegn dit su le bandiere de le comunità de mendranza linguistica e chest enceben che la defendura de le mendranze linguistiche sie anter i prinzipies fondamentai de la Republica taliana.

La bandiera taliana é stravardada ence dal art. 292 del codesc penal che punesc con la reclujion fin a doi egn chi che desprijea o danejea l tricolor. Sul pont, cognede saer che, tant la Presidenza del Consei di Ministres che le Prefeture à semper sostegnù che meter fora la bandiera de la pasc sun frabicac publics pel esser na violazion del art. 292 del codesc penal. Per regolarisar la situazion de le bandiere esprescion de mendranze linguistiche amancol doi Regions se à dat da far e le à aproà na lege regionala.

La lege 27/2001 del Friul – Venezia Giulia

Con l art. 6 de chesta lege regionala l é stat pervedù che sui frabicac publics di comuns olache se troa le popolazion de un di desvalives gropes linguistics, apede a la bandiera taliana, europeana e chela regionala, sie tacà fora ence chela de la comunità de mendranza de referiment.

La lege 26/2007 de la Region Piemont

Ence l Piemont se à dat ju per la costion e con l art. 1 l à metù neigher su bianch che sui frabicac publics di Comuns olache se troa popolazion che partegn a una de le mendranze linguistiche regionale, pel esser metù fora, apede a la bandiera taliana, europeana e regionala, ence chela de la comunità de referiment.

E la bandiera ladina?

La vera costion l é entener chi che à la competenza per poder legiferar en cont de la bandiera ladina.

La lege nr 22/1998 che se cruzia de la regolazion su la doura de la bandiera de la Republica taliana e de l’Union Europeana, te sie art. 1 la ge dasc l met a le Region de entervegnir con sia normativa, coche anter l auter à jà fat la Region Piemont e l Friul Venezia Giulia.

Apede chest ge vel tegnir cont che la Region Trentin Sudtirol l à compentenza esclusiva te la materia di enc locai. Chest conferma che l é la Region l ent che à la competenza per far fora la costion.

Aldò de mie articol vegnù fora su la Usc di Ladins ai 24 de firé del 2023 zeche, pian pian, à scomenzà a se mever.

La mozion nr. 2 aproada ai 15 de mé del 2024 dala Region Trentin Sudtirol

Ai 24 de mé del 2024 la Region Trentin - Sudtirol à manà fora n comunicat dal titol “Kompatscher - Guglielmi, oggi la bandiera ladina ottiene il giusto riconoscimento che le spetta”.

Se jon a lejer l sot titol enveze vegn fora n’autra storia: “L’aula del Consiglio regionale approva una mozione per il riconoscimento Istituzionale della Bandiera Ladina”. La mozion é stata prejentada dai conseieres regionai Paul Köllensperger, Maria Elisabeth Rieder, Franz Ploner e Alex Ploner.

Ma alora, sta bandiera ela stata recognosciuda, scì o no?

La domana no la é metuda alò a cajo, ajache gran part di media à dat chesta notizia dijan che la bandiera ladina la é stata recognosciuda dala Region. Muie de jent che me à fermà per strada me à dit che zacan la costion la era stata fata fora na outa per dute, ma coscita no l é e chest l podon entener se jon a lejer l dispositif: “il Consiglio regionale… impegna la Giunta regionale: 1. Ad integrare il decreto del Presidente della Regione del 2 aprile 2001, n. 5/L recante le “Norme regolamentari per l’uso dello stemma e del gonfalone della Regione”, prevedendo l’uso e l’esposizione della bandiera ladina sugli edifici pubblici dei comuni in cui sono insediate popolazioni appartenenti al gruppo linguistico ladino, accanto alla bandiera italiana, europea, della Regione, rispettivamente della Provincia autonoma di Trento e di Bolzano e del comune di interesse nelle stesse occasioni nelle quali vengono esposte le bandiere citate”.

Donca, speron che per i 5 de mé de l an che vegn la bandiera ladina, simbol de la mendranza ladina di ladins entorn al Sela, possa troar al più prest l giust recognosciment e fondament normatif per poder la meter fora te duc i frabicac publics de la Ladinia.